Yn thaw ka NEHUSU ia ka committee ka ban khmih halor ki kam shah lehbor jong ki kynthei hapoh ka skulbah

Syllad | The Rising MeghalayaNovember 22, 2023

Ka North Eastern Hill University Students’ Union (NEHUSU) ka la shim ia ka rai ban thaw ia ka committee ka ban shimkhia ha kaba iadei bad kino kino ki kam shah lehbor jong ki kynthei kiba jia hapoh kane ka skulbah.

Na ka liang u Finance Secretary ka NEHUSU u Samla Mandor Diengdoh haka sngi ba Ar u la ong ba hadien ki khubor kiba la paw pyrthei halor ki jingkynnoh shah lehbor jong kawei ka kynthei ha u Nantu Das uba dei u incharge ka Tnat Security bad Assistant Director of Sports Department NEHU bad halor ki shithi jingujor ba la ujor sha ka NEHUSU, kumta na ka liang ka kynhun ka la shim ia ki sienjam kiba tyngeh ia kiba kum kine ki kam kiba beain.

Nalor kata u la ong ruh ba ha ka jingtohkit bniah da ka NEHUSU hadien kine ki jingujor la shem ba une u briew uba la shah kynnoh donkti u la ju leh ia kiba kum kine ki kam jrongkti ha kaba ki lanot ki la ngat ha ka jingsyier ban pynithuh ia lade hakhmat kiba bun balang namar ka jinglehrain kaba ktah ia ka jingsngew jong ki.

Hadien kine ki jingjia, u la ong ba ki la don ruh ki khubor lyngba ki samla pule khamtam ki Research Scholars ki ba la pynpaw ba ki nongialam jong ki ki donkti ha kiba kum kine ki kam bymman.

Da kaba pynpaw ba ka NEHUSU ka la ioh pdiang ia kiba bun kiba kum kine ki jingujor shah jrongkti na ki samla pule bapher bapher, u Samla Diengdoh u la ong ba ka NEHUSU ba ka long kaba donkam kyrkieh ban khmih bniah halor kiba kum kine ki jingshah banbor hapdeng ki samla pule.

Nalor kata haba  pynpaw halor ka jingdonkam ban pynshai  paidbah halor kiba kum kine ki kam thombor, ula ong ba ka NEHUSU shen  kan sa sdang noh ia ka Gender Sensitization lyngba ki Workshops, Seminars, Lectures bad ban thaw daka Gender Sensitization Committee ban iamir jingmut halor ki kam thombor pyrshah ia ki kynthei.

Nalor kata u la ong ruh ba kiba kum kine ki jingjia kin sa paw pyrthei ha ki sngi ki por ki ban wan namar ki samla pule ki la sngewthuh ia la ka jong ka bor bad na ka liang ka NEHUSU kan shim ia ki sienjam ban ai ka jingkyrshan kaba pura na ka bynta jong kiba kum kine ki lanot.

Shuh shuh u la ong ruh ba na ka liang ka Union kan trei borbah na ka bynta ban ai ki jingpynshai bad pynsngewthuh na ka bynta ban lah ban rat dyngkhong ia kiba kum kine ki kam pyntriem pyrshah ia ki samla pule kynthei ha ki nonghikai, ki heh ba dei khmih, ki staff bad kiwei pat hapoh kane ka skulbah.”