Yn thaw ka Sorkar da ka Task Force ban khmih ia ki jingeh jong ki nongri syiar

Syllad | The Rising MeghalayaMarch 28, 2025

Ka Sorkar Jylla ka la rai ban thaw da ka Task Force ban khmih halor ki mat kiba iadei bad ki nongri syiar ha ka Jylla.

Ia kane la pyntip da u Myntri ka Tnad Animal Husbandry & Veterinary u Bah AL Hek hadien ka jingialang bad ka kynhun na ka Meghalaya Poultry Farmers and Welfare Association (MPFWA) haka 27 tarik Lber.

“Ka Sorkar kan thaw ia ka Task Force ban khmih halor ki mat kiba iadei bad ki jingeh jong ki nongri syiar,” ong u Bah Hek haba kren sha ki lad pathai khubor.

“Kino kino ki jingeh kiba ki iakynduh ki dei ban wanrah sha ka jingtip jong kane ka Task Force,” u la bynrap.

U Bah Hek u pyntip ruh sha ka kynhun ba kam shym la don satia kano kano ka jingpang ‘Bird Flu’ bad ka jingjia kaba ki la kren ka dei kaba ki la kdew ia ka jingjia kaba la jia ha u snem 2019-2020 ha Haryana bad kam dei ruh kaba dang shen.

“Lada ka dei ka jingjia kaba dang shen na ka liang ka sorkar bad ka Tnad ki la ioh ia ki jingtip bad na ka liang ka Tnad kan ym sngap jar, hynrei ngin shimkhia mardor ia kiba kum kine ki jingpang kaba jia shabar hapoh ka jylla Meghalaya,” u la ong.

Kham hashwa haba kren sha ki lad pathai khubor, u dkhot ka association u Bah William Diengdoh u la ong ba ka kynhun ka la pynpaw ka jingsngewkhia halor ka jingwan rung ki syiar kiba na shabar ka jylla khamtam na ki katto katne ki jaka ia kiba la pynbna ba ki dei kiba ioh ia ka jingpang bird flu.

Haba kdew halor ki jingmih khubor, u Bah Diengdoh u la ong ba ka la don kawei ka kali kaba la lap ba ki la wanrah ia ki syiar na ka jylla Haryana, Punjab kaba dei ka jylla kaba la pynbna bad ia kine ki syiar la lap noh mardor ha kaba la khanglad ia ki ba kin wan rung sha ka jylla.

“Da kaba shim ia ka jingmut halor kane ka bynta ngi la wan sha ka sorkar jylla ban dawa ban khang shipor, hynrei ngi sngewthuh ba ka jingkhang shipor lane kino kino ki kyndon ki lah ban ym treikam bad na ka liang ka sorkar ka la rai ban thaw da ka Task Force ban khmih halor ki jingeh bad ban pynthikna ba ka jingjurip bniah kan long katkum ki SOP ki ban long katkum ka National Action Plan ia kaba la dep ban phah da ka Sorkar Pdeng,” u la pyntip.

“Ki SOP ki la dep don lypa bad ngi khmih lynti ba kin pyniaid shakhmat ban pyntreikam ia kitei ki SOP. Mar ia pyntreikam ia kine ki SOP, kumta ruh ki nongkhaii kiba wanrah syiar kin lah ban bud ryntih lane kin ioh ban bud ruh ia ka Motors Vehicle Act katkum ka Prevention of Cruelty to Animals bad katkum ka Transportation of Livestock Rules bad lada la pyntreikam ia kine kiei kiei baroh, ngi khmih lynti ba ngin lah ban tehlakam” ula bynrap.

Haba kylli na ka liang u Bah Diengdoh u la ong ba ka kynhun ka sngewkmen shibun halor ka jingmih na kane ka jingialang hynrei ka kwah pat ban iohi ba dei ban pyni noh da ki kam.

“Ka sorkar kan thaw mardor ia ka Task Force bad katto katne na ki dkhot jong ngi kin don bynta kum ki dkhot jong ka Task Force khnang ba ngin lah ban pynsngew ia ki jingduna ne jingdkoh kiba bteng ban mih ha ki sngi ki ban wan bad ngi khmih lynti ba lada mih kino kino ki jingduna yn lah ban shimkhia mardor bad na ka liang ka sorkar ka dei ban lah ban pynbeit,” u la bynrap shuh shuh.