Yn thaw lad ka sorkar ban pynmih sa 1 lak tylli ki kam ha ka shi snem ban wan: CM

Syllad | The Rising MeghalayaFebruary 26, 2024

U Myntri Rangbah ka Jylla u Conrad K Sangma haka 26 tarik Rymphang, u la pyntip hapoh ka iingdorbar thawain ba ka sorkar ka la lah ban pynmih haduh 2.3 lak tylli ki kam ki jam lyngba ki prokram bapher bapher jong ka sorkar ha kine ki lai snem kiba la dep.

U la ong ruh ba ka sorkar mynta ka la pynkhreh ruh na ka bynta ban pynmih sa kumba 1 lak tylli ki kam ha kine ki shi snem ki ban wan.

Haba jubab ia ka jingkylli kaba la buh da u u Bah Gabriel Wahlang, u Conrad u la ong haba shim kyllum halor ka jingdon jong ki bym ioh kam ioh jam ha ka jylla ka long tang kumba 3% kaba long hapoh ia ka national average kab a long da 4.7%.

U CM u la ong ba ka sorkar jylla ka la pyntreikam ia kiba bun ki skhim bad ki prokram na ka bynta ban thaw ia ki lad ai kam ai jam.Kine ki kynthup ia ka MGNREGS, CM-Elevate, PRIMEprogram, FOCUS, FOCUS+, Mission Mode Programs in Agriculture, Meghalaya Grassroot Music Project, Chief Minister’s Youth Centre, National Rural Livelihood Mission bad Skills Meghalaya.

“Haba khein kyllum ka jinglah ban thaw ia ki lad aikam ai jam lyngba kine ki prokram bapher bapher ka long haduh 2.3 lak ha kine ki lai snem kiba la dep,” ong u Sangma.

U la ong ba ka sorkar ka la pynkhreh ruh na ka bynta ban pynmih haduh 5.5 lak tylli ki kam ki jam ha kine ki san snem ki ban wan, kata ka ban long kumba 1 lak ha kine ki shi snem ki ban wan.

Nalor kata u CM u pyntip ba haduh kumba 3,000 tylli ki kam la lah ban pynmih ha ki tnat sorkar bad kine ki kynthup ia 500 ki doktor bad 30 ki nos bad technical staff bad 1000 ki kam hikai.Watla katta u la ong ba nalor kine la thaw ruh ia ki lad ia kam ha ki district level hynrei ia kaba ym shym la ioh jingkhein satia.

Kumjuh u Conrad u pyntip ruh ba ka sorkar ka don ia ka thong ban pynmih kumba 2.5 lak tylli ki kam ha ka kam rep kam riang bad kiwei ki bynta kiba don jingiadei ha kine ki 4-5 snem ki ban wan.

U la ong ruh ba ka NRLM ka dei ka model kaba seisoh ha ki jingtreikam ha kine ki san snem kiba la dep ha kaba ka sorkar ka la lah ban thaw haduh 1 lak tylli ki kam ki jam na ka bynta ki kynthei bad ban thaw biang sa kumba 1 lak ha kine ki 4 snem ki ban wan. U la bynrap ruh ba lyngba ka Skills Meghalaya la lah ban aijinghikai sha kumba 1.2 lak ngut ki briew ha kaba 50% na kine ki la ioh kam ioh jam.

Shuh shuh u CM u la ong ba ki kam jngohkai pyrthei ruh kin plielad ha ka liang ka aikam ai jam ha kiba bun rukom ia kumba 50,000 ngut ki briew katba ka CM-Elevate kan pynmih ia kumba 50,000 tylli ki kam bad kumba  20,000 ki kam ha ki IT sector. Katba sa kumba 10,000 tylli ki kam yn thaw lyngba ki prokram bapher bapher jong ka Sorkar.

Kumta ruh u CM u la ong ba ka jingthaw ia ki lad ia kam ai jam kan kynjoh sha ka 5.5 lak ngut ha kine ki san snem ban wan.