Yn ther jur u slap ar sngi ha Jylla, kyntu ka sorkar iaki paidbah ban husiar

Syllad | The Rising MeghalayaApril 13, 2022

Ka Indian Meteorological Department (IMD) kala pynmih iaka jingmaham ba u slap un ther jur h ryngkat ka lyer, leilieh bada u pyrthat haka 14th & 15th Iaiong, 2022.

Ka sorkar lyngba ki Deputy Commissioner jong ki district bapher bapher kila pynmih iaka jingkyntu ban kyrpad ia ki paidbah ban shim ia kine ki lad jingiada bad ban husiar haba iaid ba ieng ban lait na ki jingma jingmynsaw.

Kane ka jingmaham jur ka kynthup ha Jylla Meghalaya, Assam, Arunachal Pradesh bad kiwei kiwei.

La kyntu iaki paidbah ban khmih bad pynskhem bha ia ki tiar ki tar kiba lah ban shah rong ha ka lyer kum ki thup dieng, ki tin sop lane mawit ba shong synjor, ki tin/ sop theh nuit, ki sign board bad kiwei kiwei ki mar kiba lah ban shah rong ha ka por ba jur lyer. Lada ka jingba leilieh ka long kaba jur bad nehslem kan bha shibun ban nym pyndonkam ne ban pynmeh ia ki tiar elektrik kum ki mobile, isteri, radio, telebision bad kiwei kiwei ki tiar kiba pyndonkam da ka bor elektrik.

Ki nongshong shnong kidei ban long kiba phikir ban iada ialade namar ka jingshlei um ka lah ban jia hadien jong u lapbah khamtam ha ki jaka kiba harud jong ki wah bad ki wahduid.

La kyntu ia ki paitbah ban kiar na kaba jam ia ki wahduid, ki wahbah bad ki kshaid ha ka por ba jur slap. Phim thikna ia ka bor jong ka bad ka um kaba jyndong bad tuid sted ka lah ban pynkyllon ia phi.

Wat tur ne niah ia ki kali haba don ka jingshlei um bad kiar na ki post electrik ban lait naka jingshah bat ha ki bor electrik.

Sangeh ban mih na iing haka por bajur slap bad lyer lait noh ki kam ba kyrkieh. Ka ba bha ban ym niah kali ha ka por slap khamtam kito ki surok ba shlei um namar lada ka kali ka sniew ka long kaba eh ban iarap. Da iaki lad ki lynti ba kham shngain da kaba iaid suki napdeng ka surok khnang ban ym mynsaw. Kynmaw ban buh lypa ia ki battery bad torchlight hajan. .

Kynmaw ban buh lypa ia ki jingbam bakongsan kum ki roti, biscuits ne kino kino ki jingbam ba rkhiang ne tyrkong bad kumjuh ki dawai. Kynmaw ban pynlip ia ki ding electric shwa baphin leit ne mih sha bar.

Lada jia ba shlei um kynmaw ban pynlip ia ka gas bad ki power line. Pynlip ia ki lights bad ki pakha baroh lada ki jhieh. Barabor dih da ka um syaid ban lada na kano kano ka jingpang. Lada phi wan na sha bar kynmaw ban sait bha ia ki kti ki kjat.