Yn thir bniah ka NPP halor ka jingshah rem ha kane ka ilekshon Lok Sabha: Prestone

Syllad | The Rising MeghalayaJune 6, 2024

U President jong ka Seng National People’s Party (NPP) ka Jylla uba dei ruh u Symbud Myntri Rangbah ka Jylla u Bah Prestone Tynsong ha ka 5 tarik Jylliew u la pyntip ba ka party shen kan pynlong ia ka jingialang bishar bniah halor halor ka jingbym lah ban lehbha ha kane ka ilekshon Lok Sabha kaba dang shu dep.

Ka NPP ka la shah rem noh na baroh ki ar jaka kata napoh Tura bad Shillong parliamentary constituency.

Haba kren sha ki lad pathai khubor u Bah Prestone u la ong, “Ngi pdiang sngewbha ia ka rai u paidbah, kata la ka long halor ka jingshah rem noh napoh Tura bad na Shillong Lok Sabha Seat kumjuh.

“Ngin bishar bad thir bniah, ngin sa wad ia ki jingduna bad ki jingbakla bad ngin sa shim ia ki sienjam kiba dei ban leh. Ka jingshah rem ha ka ilekshon la kadei ka jingshah rem kput ne rem khyndiat ruh kam don jingiapher ei ei namar wei ba la rem la rem bad wei ba la jop la jop, kumta ka party jong ngi shen kan sa shong bishar bniah, ngin sa iatai bad wad bniah halor kane bad hadien ngin sa shim ia ki sienjam kiba donkam,” ong u Bah Prestone.

U Bah Tynsong u la ong ruh, “Baroh ki nongkitkam ka party, ki nongialam jong ka haduh ki block level ki la trei shitom shisha hynrei ngi dang rem pat. Kumta ngi burom ia ka rai jong u paidbah bad ngi hap ruh ban sngewbha ia kawei ba kane kam mut pat ba ka ilekshon ka ban wan ngin rem noh. Ka ilekshon ka dei ka ilekshon ia kaba ngi hap ban pdiang bad ym tang ban pdiang ia ka jingshah rem hynrei ngi hap ruh ban sumar bha ia ka. Ngi la hap ban bishar bniah biang ia ki rukom treikam jong ka party ha man la kawei pa kawei ka MLA lane MDC constituency.”

Haba kylli, une u heh ka NPP u la ong, “Nga tharai ngin ia leit biang sha ka por naduh ba ngi ioh ia ka jinglaitluid kum ka ri India, Ngam ju iohi ia ka histori ka ban jia ba kino kino kiba pyniaid ia ka sorkar kin hap ban hiar shuki noh. Ka long ka bym iahap satia bad ka dei ka jingkren khunlung da u president badon burom jong ka VPP. Nga tharai ma u ruh un hap ban leit sha ka histori bad ba un ai ia ka nuksa kaba shai ia nga halor kum katei ka jingjia ha ka histori jong ka ri, bad katkum ka jingtip ka jong nga hi kam shym la don saia kano kano ka histori kaba la jia naduh ka sngi kaba nyngkong ba ngi la ioh ia la ka jong ka jinglaitluid kat haduh mynta la ka long ha kano kano ka jylla lane wat ha ka sorkar pdeng hapoh Delhi.”

Nalor kata u Bah Tynsong u la kynthoh ruh ia ka jingkam jong u Bah Ardent ba ka VPP kan mih bujli ha ka jaka jong baroh ki Seng Riewlum ha Meghalaya.

“Nga ieh ha ka jingstad jng ki nongthep vote namar lada iakren halor ka jingmih bujli ha ka kam sain pyrthei kum ka party sain hima kan don satia ka jingkut. Ngam tharai ba ki nongialam jong kino kino ki party sain hima kin shu ong ba mynta ngi dei ban klet noh ia ka HSPDP, UDP bad ba kin leit pyniasoh noh bad ka VPP. Nga tharai ka dei kane ka khubor kaba u kwah ban ai,” ong u Bah Prestone.

Shah shuh ha kaba iadei bad ka jingknieh noh jong ka Congress ia ka Tura Parliamentary Seat hadien 47 snem kynthih, u Bah Prestone u la ong ba ha ka kam sain pyrthei ka seng sain pyrthei kam dei satia kaba la longtrai da kano kano ka longiing ne jong kino kino hynrei ka dei beit ka nongkynti jong u paidbah.