Yn thoh ka sorkar jylla sha Delhi ban pyllait ia ka Meghalaya na ka CUET: Rakkam
Ka sorkar Jylla ka la shimkhia ha kaba iadei bad ka rukom pyniaid ia ka eksam Common University Entrance Test (CUET)-UG-2024 kaba la pynmih ia ka kynrum kynram hapoh NEHU bad shim ruh ia ka rai ban thoh sha ka Sorkar Pdeng na ka bynta ban pyllait noh ia ka Jylla na ka CUET.
Haba kren sha ki lad pathai khubor, u Myntri ka Tnat pule puthi u Rakkam A Sangma u la pyntip ba na ka liang u Myntri Rangbah ka Jylla u Conrad K Sangma ruh ula shimkhia halor kane ka jingjia bad khot ruh ia ki dkhot jong ka National Testing Agency (NTA) bad North Eastern Hill University (NEHU) ha ka jingialang kaba la long ha ka 16 tarik mynta u bnai ban iakren halor katei ka jingjia kaba la jia hapoh NEHU.
![](https://www.syllad.com/wp-content/uploads/2024/09/JIT-Vacancy-823x1024.avif)
Nalor kata u Rakkam u la ong ruh ba u CM u la shimkhia ruh na ka bynta ban iakren bad ka sorkar pdeng bad k NTA na ka bynta ka jingmyntoi bad ka bha ka miat jong ki samla pule. “Ngin thoh ruh na ka bynta kito ki samla pule kiba iakhun ia ka CUET ba kin ioh rung klas hapoh NEHU bad ruh ban ailad biang ia kito ki samla pule sa shisien pat ba kin ioh iakhun ban ioh rung klas ha ki kolej kiba don jingiateh bad ka NEHU bad ba kin pyllait noh mynta u snem na ka CUET,” u la bynrap.
Namar kine ki jinglong jingman, u Rakkam u la ong, “Kumta ruh ngi la wanrah ia la ka jong ka State University. Kiba bun na ki kolej kiba iateh bad ka NEHU ki lah ban ai ia ka rai ban pyniasoh noh bad ka Captain Williamson Sangma State University.”
U la ong ruh ba kam shym la don satia kano kano ka jingpynkhreh bad ka jingiatreilang na ka liang ka NTA kaba la lam sha kane ka jingmih jong ki kynrum kynram, kata da kaba ong ruh ba ka NTA kam shym la kynjoh ktien satia ia ka sorkar Jylla kynthup ia ki Deputy Commissioner ban khmih lem ia ka suk ka jinglong jingman bad ban pynbiang ia ki bor pahara.
“Ha ka jingialang na ka liang ki heh ka NEHU ki la pyntip dier por palat sha ngi, ka NTA ka la pyntip sha ki bor ba dei khmih jong ka NEHU ha ka 14 tarik mynta u bnai ha ka por 6 baje janmiet ba ki dei ban long kiba la pynkhreh na ka bynta ki 2000 ngut ki samla pule, hynrei hapdeng jong ka miet, ka NTA ka la pyntip pat ba kin long kiba la pynkhreh sa na ka bynta 4000 ngut ki samla. Kumta kim don ia ka por kaba biang ban ioh pynkhreh namar ka jingbym biang ka jingpyntip na ka NTA,” u la ong.
U la ong ruh, “Ka NTA bad ki heh ka NEHU ki la pyntip sha ngi ba tang kawei ka kynthei, kawei ka samla kim shym la lah ban iakhun ia kane ka eksam CUET ha katei ka sngi. Hynrei, watla katta ka la don ka jingslem.Ki la don ruh ki jingthut ha ka biometric bad hadien ba la ai dak da ka NTA kumta ruh ki la iaid beit shakhmat khlem da pyndonkam shuh ia ki biometric.”
Haba kylli, u Rakkam u la ong, “Namar kane ka jinglong jingman, kiba bun na ki samla pule kim shym la lah satia ban lehbha. Ngin sa kyrpad ban pyllait biang noh ia ka Meghalaya namar mynta ngim tip shuh katno ngut ki samla pule kim shym la ioh ban ialeh ia ka eksam lane kiba la shah ktah namar kane ka jingjia.
Shuh shuh u la ong ba ka sorkar Jylla kan sa thoh ruh sha ka NTA ban kyntu ba ki dei ban da pynkhreh bha na ka bynta ban pynlong ia kum kine ki eksam kiba kongsan. U la ong ruh ba ka NYA ka dei ban shim ia karai halor kane ka jinglong jingman baroh.
Leave a Reply