Yn thoh u Myntri ka tnad Excise sha ka sorkar Assam ba khang pynpoi ia ki mar excise sha Rilum Garo

Syllad | The Rising MeghalayaAugust 13, 2024

U Myntri ka Sorkar Jylla uba khmih ia ka tnad Excise, u Bah Kyrmen Shylla ha ka 12 tarik Nailar u la ong ba un iakren bad u Myntri ka tnad Excise ha Assam halor ka jingbym ai ia ka transit pass na ka bynta ban pynpoi ia ki mar excise shapoh Rilum Garo lyngba kane ka Jylla ba marjan.

Hadien ba la pynlong ia ka jingialang, u Bah Shylla u la ong, “Ngan thoh da ka DO (dimi official) letter sha u Myntri ka tnad Excise ka Assam halor kane ka mat hadien ka 15 tarik mynta u bnai.

“Ngam tip na kaei ka daw ba ki la sangeh ban ai ia ki transit pass. Kim shym la ai jingtip ei ei halor kane”, u la ong.

Haba kylli, u myntri u la ong ba watla ki don ar tylli ki lynti kiba lah ban kit ia ki mar shapoh Rilum Garo, hynrei ka jinglut jingsep ka long kaba heh bha lyngba ka Nongstoin. “Hynrei ka jinglut jingsep ka duna bha lyngba ka Assam. Kumta ngi kwah ban pynbeit ia kane ka jingeh. Ngi kwah ban kyrpad ïa ka sorkar Assam, khamtam ïa ka tnad Excise ba kan kyrshan sngewbha ïa ngi,” ong u bah Shylla.

 U la ong ruh, “Ka Transit pass ka dei tang ban poi sha ka jaka ba thmu bad sangeh ban poi sha ka jaka ba thmu, kata kam dei ka jingpynbeit bad kam long kaba donkam.”

Nalor kata u la ong ruh u Chief Secretary ha ka kyrdan jong u ruh un rah ia kane ka kam bad u Chief Secretary ka Assam. Lada ka lah ban long ia kane ka kam ym lah ban pynbeit tang ha ka kyrdan ophisar, bynra u Bah Shylla.