Yn thung 1200 ngut ki nonghikai shwa ka Khristmas, ong u Rakkam Myntri Pule Puthi

Syllad | The Rising MeghalayaOctober 28, 2023

U Myntri ka Tnat Pule Puthi u Rakkam A Sangma haka sngi Thohdieng u la ong ba ka sorkar kan pyrshang ban pyndep ia ka thong ban thung sa kumba 1,200 ngut ki nonghikai hapoh ki kyrdan lower primary bad ki upper primary school hashwa jong ka Khristmas.

Hadien ka jingiakynduh bad ki nongialam ka seng Hynniewtrep Youth Council (HYC) ha ryngkat ka jingdonlang ki nongialam na kiwei pat ki district, na ka liang u Myntri u la ong ba ka sorkar ka la pynkhreh ban pynlong ia ka interview na ka bynta kito kiba la pyndep ia ka Meghalaya Teachers’ Eligibility Test (MTET) naduh ka 15 tarik u Naiwieng u ban wan na ka bynta ban pyndap ia palat 1,200 tylli ki kam kiba lait hapoh ki  government lower primary school bad na ka bynta palat 300-400 tylli ki upper primary school ha ka jylla.

“Na ka bynta ki lower primary school ia ki interview la dep ban pynbeit ban pynlong naduh ka 15 tarik u Naiwieng 2023 bad ngin pyrshang ban pyndep ia kane ka bynta shwa ka Khristmas, bad shwa kane ka Khristmas ngin sa lah ban thung noh ia kito kiba dei ban ioh” ong une u Myntri.

Kham hashwa haba kren sha ki lad pathai khubor, na ka liang u president ka HYC West Khasi Hills District u Bah Lumlang Kharsyiemlieh u la ong ba ka jingbym don nonghikai katkum ka jingdonkam ha ka jingdon jong ki khynnah bad nonghikai ka la ktah jur ia ka pule puthi hapoh ka district West Khasi Hills, bad ka long ruh kum ka jingleh bym hok kaba ktah ia ki khynnah skul kiba pule ha kito ki skul. U la ong ruh ba ka Seng ka kyntu ia une u Myntri ba dei khmih ba un shim mardor ia ki sienjam ban thung ia ki nonghikai kiba la tbit ha baroh kine ki skul ha ka district katkum ki kyndon ba la buh.

Une u nongialam ka Seng u la ong ba ki la don haduh kumba 90 tylli ki Govt LP School hapoh ka district ha kaba ka jingdon jong ki khynnah ka long kumba 50 haduh 100 lane palat ha kawei kawei ka skul.Hynrei, na ka liang ka sorkar ka la thung tang 1 ne 2 ngut ki nonghikai ha kawei kawei ka skul, bad kine ki nonghikai ki hap ban shim klas ia ki khynnah naduh nursery haduh class V.

Nalor kata u Bah Kharsyiemlieh u la kyntu ruh ia u Myntri ba un shimkhia na ka bynta ban maramot ia ki iingskul sorkar kiba la rim bad tor bad ki ban ym lah shuh ban dang pynlong skul ha kane ka snem ka ban wan.

Shuh shuh ka HYC ha ka memorandum sha une u Myntri ka tnat pule puthi ka la dawa ruh na ka sorkar jylla ba kan thung ia ki nonghikai ba pura ne permanent na ka bynta baroh ki subject ha ki higher secondary section jong ka Sib Sing Memorial Government School ia kaba la seng ha ka snem 1995 ha Nongstoin.

Ka HYC ka la ong ruh ba ym shym la thung nonghikai na ka bynta ka subject Mathematics nalor kiwei pat ki subject Arts ba kongsan kat haduh mynta hapoh kane ka jaka pule. Ka la ong ba ki la don kumba 6 ngut ki nonghikai ba la thung kum ki contractual basis bad kim shym la don ki sienjam ba la shim na ka bynta ban thung ia ki nonghikai ba pura, bad kane ka la kat jur ia ki khynnah pule.

“Ngi kwah ruh ban pyntip ba ia ka iingskul bathymmai ia kaba la plie ha ka 17.01.2023 da u Myntri Rangbah ka jylla hynrei ka long kaba sngewsih ba kane ka iingskul kam don ia ka bording ilektrik kaba biang bad ia kiwei pat ki jingdonkam ba kongsan,” pynpaw ka Seng HYC da kaba kyntu ban shim mardor ia ki sienjam halor kane ka bynta.

Shuh shuh ka HYC ka la dawa ruh na ka sorkar na ka bynta ban tei noh ia ka building kaba thymmai na ka bynta ka ophis  SDSEO khnang ban pynthikna ia ka jingai jingshakri kaba biang hapoh ka district hi baroh kawei.