Yn thung ka NEHU da ka inquiry committee ban tohkit halor ka jingshah thombor u Professor

Syllad | The Rising MeghalayaApril 25, 2025

Ki bor pyniaid ka Skulbah North Eastern Hill University (NEHU) ki la rai ban thaw da ka inquiry committee na ka bynta ban pynlong ka jingtohkit halor ka jingshah thombor jong u Professor Dr Alok Singh hapoh ka ophis treikam jong u kaba la jia ha ka 24 tarik Iaiong.

“Na ka liang ka Vice Chancellor Incharge ka Prof SM Sungoh bad ki bor pyniaid, ka University ka pynrem jur halor kino kino ki kam thombor ha phyllaw jong ka University,” ong u NEHU PRO u Dr Davidson Pyngrope ha ka kyrwoh.

“La wanrah sha ka jingtip jong ki bor pyniaid ba u nonghikai jong ka skulbah u la shah thombor ha ki katto katne ki riew runar. Une u lanot u la dep ruh ban mudui da ka ejahar hapoh Mawkynroh Police Outpost. Halor kane ka jingjia. Mynta kane ka kam ka la don ha kti jong ki pulit bad ka jingtohkit ka la iaid shakhmat,” u la bynrap.

U Dr Davidson u pyntip ba ka University kan sa thung ruh ia ka inquiry committee ka ban khmih halor kane ka phang.

“Ngi la kyntu ia ki dkhot jong ka skulbah, kynthup ia ki samla pule ba kin sngewbha ban pynneh pynsah ia ka jinglong ba bha jong ka skulbah,” u la ong.

Nalor kata, ki bor pyniaid ki la kular ruh ba ka jingshngain jong ki nonghikai, ki nongtrei bad ki samla pule ka dei kaba kongsan tam na ka bynta ki bor pyniaid jong ka skulbah.

Mudui ejahar u Professor NEHU ia u president ka NEHUSU bad 5 ngut kiba thombor ia u