Yn tynruh ka VPP ia ka Sorkar Pdeng ban dawa pyntreikam ia ka Article 371 ha Meghalaya: Ardent

Syllad | The Rising MeghalayaFebruary 6, 2025

U nongialam ka Voice of the People Party (VPP) u Bah Ardent Miller Basaiawmoit haka 6 tarik Rymphang u la ong ba ka party jong u kan leit tynruh ia ka Sorkar India ban dawa pyntreikam ia ka Article 371 ha Meghalaya.

Haba kren ha ka jingialang ialap elekshon ha Umsning, Ri Bhoi District, u Bah Ardent u la kynthoh jur ia ka jingkren ba dang shen jong u Myntri sorkar uba dei ruh u nongialam ka United Democratic Party (UDP) u Bah Paul Lyngdoh uba la ong ba ka Article 371 ka la jah na ka manifesto jong ka VPP na ka bynta kane ka elekshon Autonomous District Councils (ADC) ha Rilum Khasi-Jaintia.

“Kum uwei na ki Myntri sorkar uba ju kren pyrshah bha halor ka Article 371, hadien ba u la shah kynthoh na kiba bun ki liang, u la kynnoh ba ka VPP kam shym la kynthup ia ka Article 371 ha ka manifesto na ka bynta ka elekshon ADC. Nga sngew lyngngoh ba u Myntri sorkar um tip kaei ka Article 371 bad ba ngi hap ban dawa ia ka Article 371 na ka Sorkar India  bad ym na ka elekshon ADC. Haduh katno phi lah ban ialam bakla ia ki paidbah?” U la ong.

U Bah Ardent u la ban biang ba ka Article 371 ka long kaba kongsan bha na ka bynta ban iada ia ka jylla Meghalaya na ki ain ka Sorkar Pdeng kiba tuklar ia ki kolshor bad ka rukom im jong ki trai ri trai muluk.

U la kam ba ki paidbah kim shym la sngewthuh ba ka kam beh mrad ia kaba la khot ha ka khasi ‘leit sikar’ kaba dei ka bynta jong ka kolshor ka la duh noh namar ka jingpyntreikam ia ka ain iada ia ki mrad khlaw (Protection of Wildlife Act) jong ka Sorkar India.

“Mynta lada u bsein u wan sha ka iing jong phi, phim lah ban pyniap ia u hynrei phin hap ban aiti sha ki bor ba dei khmih.”

Une u nongialam ka VPP u la ong ruh, “Balei ka don ka jingkhang ban tih ia ki mar pohkhyndew major bad minor mineral , kane ka dei namar ka jingpyntreikam ia ki ain ka Sorkar Pdeng, hynrei kine ki juh ki ain ka Sorkar Pdeng kiba treikam ha Meghalaya kim treikam satia ha ki jylla kum ka Nagaland bad ka Mizoram namar la iada ia ki hapoh ka Article 371.”

“Kumta, phi donkam ban sngewthuh ba ka District Council ka thaw ia ki ain kumba la aibor da ka Sixth Schedule jong ka Riti Synshar Ri. Haba ka Meghalaya ka ioh ia la ka jong ka Jylla, ki la pynrung ruh ia ka para 12 (A) ha ka Sixth Schedule ban pynthikna ba kan ym don artylli ki bor ha ka jylla. Ka Riti Synshar jong ka Ri India ka kdew shai ba lada ki don ki ain kiba iatyngkhuh ba la mynjur da ka District Council kim lah ban buli halor ia ki ain ba la mynjur da ka sorkar Jylla,” u la kam.

U la maham ruh ba kan poi ka por ha kaba ka BJP kaba ialam ia ka sorkar pdeng kan pyrshang ban pynurlong ia ka thong halor kawei ka ri kawei ka niam, kawei ka kolshor bad u la ong ba ki lah ban wanrah ia kajuh ka ain khyndew ka ban shah ia ki bym dei ki riewlum ba kin thied jaka ha Meghalaya.

“Ka Meghalaya of Land Transfer (Regulation) Act, 1972 ka la iada ia ki jaka puta ki jong ngi ha kaba ki briew kiba na bar kim lah satia ban thied jaka ha ka jylla jong ngi, hynrei mynta ka sorkar ka la pyrshang ban pyntlot ia kane ka ain,” bynrap u Bah Ardent.