Yn ujor ka Congress sha ka High Court ban mait kyrteng ia ki 3 ngut ki MLA phet seng

Syllad | The Rising MeghalayaNovember 30, 2024

Ka liang pyrshah Congress ka la rai ban mudui shen da ka mukotduma sha ka iingkashari Meghalaya High Court ban dawa mait kyrteng noh ia ki lai ngut ki MLA barim jong ka namar ka jingleit pyniasoh sha ka party synshar National Peoples’ Party (NPP).

Kane ka rai ka la wan hadien ba u Lamphang ka iingdorbar Thaw ain u Thomas A Sangma ha ka 27 tarik Naiwieng u la pynskhem ba ka rai jong u halor ka jingpyniasoh jong ki lai ngut ki MLA ka Congress sha ka NPP ka dang neh, hynrei la pdiang sngewbha ia baroh ban ujor pyrshah ia kane ka rai.

U Thomas Sangma u la ong, “Ngi don ha ka synshar paidbah, baroh ki don ia ka hok ban ujor. Nga la ai ia la ka jong ka jingmut. Nga la ai ia ka rai bad kane ka rai ka dang ieng, hynrei la pdiang sngewbha ia baroh ban ujor halor kane ka rai.”

“Hooid man la ka por ba don ki jingujor, ngi pule bniah ia ki bynta jong ka jingujor. Ngi phah sha ki riew shemphang jong ngi ha ka liang ka ain. Ngi shim jingmut bad katkum kata ngi ai biang ia ka jubab ka jong ngi,” u la pynpaw.

Hynrei haba kren sha ki lad pathai khubor ha ka 29 tarik Naiwieng, u MLA ba marwei ka Congress uba dei ruh u Chief Whip ka liang pyrshah u Bah Ronnie V Lyngdoh u la ong ba ka party ka dang bteng ban iamir jingmut ba ki riew shemphang ia ka ain na ka bynta ban leit mudui sha ka iingkashari pyrshah ia kane ka rai jong u Lamphang.

Pyntip ka Congress ba lah ban wan pyniasoh biang u Bah Charles Pyngrope

“Ngin sa shim bad ngin sa mudui mukotduma sha ka iingkashari High Court bad ngin sa peit ia ka sienjam kaba bud ha ka rukom kaba dei. Mynta ngi dang pynkhreh ia ka bad lehse ha kine ki khyndiat sngi ngin sa mudui mukotduma namar ngi dang iamir jingmut bad ki riew shemphang ha ki kam ain, bad ka kynhun ha ki kam ain ki la leit sha Delhi ban iakynduh ia ki riew shemphang kiba tip bha ha kaba iadei bad kane ka ain kyntiap seng ne anti defection law,” u la ong.

Ka Congress ka la mudui ia ki artylli ki jingmudui, kawei ka long pyrshah ia ki ar ngut ki MLA ba shah sospon, kata u Bah Charles Marngar (Mawhati) bad u Bah Gabriel Wahlang (Nongstoin) bad kawei pat pyrshah ia u Dr Celestine Lyngdoh (Umsning) hadien ba ki la leit ban pyniasoh sha ka NPP ha ka 19 tarik u Nailar ba la dep.