Yn wad bniah ka NCW halor ka jingdon jong ki longkmie khlem lok ha ka Jylla

Syllad | The Rising MeghalayaJuly 9, 2024

Ka National Commission for Women (NCW) kan pynlong ia ka jingwad bniah halor ka bynta kaba iadei bad ka jingnang bun jong ki longkmie kiba khlem lok ha ka jylla Meghalaya kaba ai jait sha ka kmie.

Haba kren sha ki lad pathai khubor haka 8 tarik Naitung, ka Chairperson ka NCW ka Rekha Sharma ka la ong, ha Meghalaya lada phi pynpaw ba ki don bun ki longkmie kiba khlem lok namar ka jingleh donbor Ngan jin da la kmen palat ban pynlong ka jingwad bniah halor kane. Ngan kyntu ia ka Kong Delina Khongdup kaba dei ka dkhot ka NCW ba kan wad bniah bad ban khmih kumno ngi lah ban iarap ia ki.

“Hynrei, ka jingkylla marwei khlem lok da kaba jied bi Nga tharai ym donkam ban tuklar, hynrei lada ki kylla long da kaba jia ryngkhat ne da kaba shah leh beijot ha kino kino lane shah leh donbor kane ka dei da kawei pat ka mat, hangne ngi hap ban tuklar ban iarap ia ki,” ka la ong.

Katkum ka kaiphod halor ka ‘Exploratory Study on the Socio-Economic Status and Problems of Single Mothers in Meghalaya’ ia ka ba la leh da State Commission for Women ha u 2022, ki don haduh 3078 ngut ki longkmie ba khlem lok ha ki 7 tylli ki District napdeng ki 12 tylli kiba la dep leh survey.

La ong ba haduh 46.2% ki dei ki bym nang ban thoh ne pule katba 28.4% ki dei kiba dang pyndep tang ia ka primary school. Namar ka jingshah iehnoh ne kylla riew kynthei, kine ki longkmie ki la hap ban kit hi ia ka lyngkor ban pyniaid ia ka iing ka sem.

Halor ka jingpyntreikam ia ki kyndon ain kam bymman bathymmai, ka Chairperson ka la ong, “Hooid kan long ka jingmyntoi na ka bynta ki longkmie, kata lada u briew u kular ban iathoh shongrkurim bad iapoi kha bad kata ka briew hynrei ha kaba khatduh um trei ban iathoh bad ka une u briew u lah ban shah pynngat ha ki kyndon ain.Kane ka dei ka ain bathymmai kaba la treikam. Wat ha ka IT Act, lada ki briew ki kren tohmet ia ki kynthei lyngba ki online, ki lah ban shah pynngat kam bymman ha ki Pulit. Ki don shibun ki kyndon jong kane ka ain thymmai, ki ban iarap bha ia ki kynthei.”

Haba kylli halor ka jingkiew jong ki kam pyntriem pyrshah ia ki kynthei, ka Sharma watla katta ka la ong ba ia kine ki kam la pyntip namar ki kynthei mynta ki la tip ia la ka jong ka hok nalor ki lad pathai khubor bad ki pulit ki la trei khlem shongthait ban pathai bad rejister ia kum kine ki case.

Nalor kata ka la pynpaw ruh ba ka thain Shatei Lammihngi jong ka ri ka dang dei hi ka jaka kaba shngain tam ia ki kynthei haba ia nujor bad kiwei pat ki bynta jong ka ri India.Ka la pyntip ruh ba ki dkhot ka NCW ki la shimkhia ia kawei pa kawei ka case kaba iadei bad ki kam bymman pyrshah ia ki kynthei ym tang ha Meghalaya hynrei ha man la ki jylla ha ka thain Shatei Lammihngi.

Shuh shuh ka la pyntip ruh ba ka Commission ka la shim suo motu case ruh pyrshah ia ka jingshah thombor ba dang shen jong kawei ka kynthei ha Rilum Garo kaba la jia dang ha kine ki khyndiat sngi ba la dep.

Ka la pyntip ruh ba na ka liang ka Commission ha ryngkat ka NALSA ki la pynlong ruh da ki prokram jingpynshai ha baroh kawei kari India ha kaba iadei bad kane ka phang naduh kine ki laitylli ki snem kiba la dep.