Yn wan tem u Bryan Adams ha JN Complex, da ka technology ban ym pynsniew ia ka madan, ong u CM

Syllad | The Rising MeghalayaSeptember 5, 2024

U Myntri Rangbah ka Jylla u Conrad K Sangma u la pynpaw ba kiba bun ki ri ka pyrthei barabor ki ju pynlong ia kiba bun ki tamasa bapher bapher kum ki concert bad kiwei pat ha ki madan ialehkai, kata la ka long ha ki madan ialehkai kriket ne phubol kumjuh.

Kane ka jingpynpaw jong u Myntri Rangbah ka la wan long ruh hadien ba u la jubab ia ka jingkylli halor ka ka sur bynniaw na ki paidbah hadien ba la ioh jingtip ba ka sorkar ka thmu ban pynlong ia ka concert hapoh JN Stadium, Polo, ka jingwan jong u nongrwai ba pawnam ka pyrthei u Bryan Adams ha ka 10 tarik u Nohprah 2024.

Lah ban kdew ba kane ka madan kaba la bam por haduh ar snem ban shna pynbha ia ka jaka ban ialehkai phutbol, ha kaba dang shen la ioh ruh ban pynlong ia ka group state jong ka Durand Cup bad kumjuh ia ka jingiakhun jong ka quarterfinal bad ka semifinal jong kane ka lympung.

U Myntri Rangbah u la pynshai ba ha kane ka juk kaba mynta don ka technology kaba u phlang jong kane ka madan baroh kawei lah ban tap bad ki paidbah ki lah ban ieng ha ka madan khlem da ktah ne pynjot pat ia u phlang uba la thung kyrpang ha kane ka madan bad kin don ruh ki kato katne ki bynta kiba lehse u phlang u lah ban sniew, hynrei u la ong pat ba tang hapoh 7 sngi yn lah ban shna bad ban pynbha biang ia kane ka madan hi baroh kawei.

Nalor kata u la ong ruh ba naduh kaba sdang ka la don lypa ka jingthmu ba ia ki madan yn lah ban pyndonkam ha kiba bun ki tamasa ruh hynrei u la ong ba kito kiba pynlong ia ki tamasa kin hap ban shim ia ka jingkitkhlieh ban pyndonkam ha kaban tap ne siang ia ki kynjan rynsan kiba paka ha baroh kawei ka bynta jong ka madan khamtam kaba dei ka madan ba ialehkai ia ka phutbol.