Yn wan Wahiajer u CM ha ka Sngi Bandh ka NESO

Syllad | The Rising MeghalayaDecember 9, 2019

JOWAI: Hapdeng ka jingkthang mynsiem jong ki paidbah jong ka thain Shatei Lammihngi na ka daw jong ka jingwanrah bad jingmynjur jong ka Citizenship Amendment Bill (CAB) da ka Sorkar kmie Lok Sabha, U Chief Minister jong ka Jylla u Conrad K Sangma un wan sha ka Shnong Wahiajer ban sahkhi ia ka phainal jong u Sniawbha Dhar Football Tournament lashai ka sngi.

Ka thymmei khubor kaba thikna u Conrad un wan beit sha ka Shnong Wahiajer namar la khot sngewbha ia u da u Myntri ka tnat Transport u Ma Sniawbha Dhar bad pynlut por wat hapdeng ka jingkhot pakhang shnong da ka Seng North East Students’ Organization (NESO).

Ka Seng NESO ka la khot ia ka pakhang shnong naduh ka por 5 baje mynstep haduh 4 baje janmiet lashai ka sngi ban pyrshah ia ka CAB.

Ia ka CAB la mynjur ha ka Lok Sabha mynta ka sngi haba 293 ngut ki MP jong ka seng BJP bad ki paralok jong ka ki la kyrshan ia katei ka Bill katba 82 ngut ki MP ki la pyrshah ia katei ka bill.

Ka Seng NPP kaba la khliehduh da u Conrad K Sangma ka long kawei ka ka seng kaba kyrshan ia ka Sorkar BJP ha Delhi bad ha ka Jylla Meghalaya ka la kdup ia ki arngut ki MLA ka Seng BJP.

Ha kawei pat ka liang, ka Sorkar Jylla mynta ka sngi ka la hukum ia ki ophisar bad nongtrei sorkar ban wan trei lashai ka sngi khlem pep bad lada mano mano ba pep ka sorkar kan pynshitom ia ki.

Ka Skul Bah North Eastern Hills University ka la pynkynriah noh ka examination jong ka Degree level kaba la pynbeit lashai ka sngi sha ka 14^th tarik mynta u bnai.