Yn wanrah tabut ka Seng Khasi Kmie ha Jowai
Kum shi bynta ka dak jong ka jingiatylli kaba long artad kum shi bynta ban pynpaw hakhmat ka pyrthei ia ka jinglong kawei ka jaidbynriew Khasi-Pnar, mynta ka kynti ka Seng Khasi Kmie ka la pdiang da kaba burom ia ka jingkhot sngewbha ba kyrpang da ka Seiñraij Jowai naka bynta ban shna bad ban leit rah ia kawei ka tabut ne ka rot sha ka lehniam Behdieñkhlam 2022.
Kane ka jingiatreilang lang hapdeng kine ki artylli ki seng niam ka jaidbynriew, ka long ban pyni ia ka nuksa ia ka jinglong kawei ka jaidbynriew, kampher wat lada la iapher ha ka niam ka rukom ki riti ki dustur, pynban ia ka thymmei wan longbriew man briew kum ka jaidbynriew ka dei beit tang na u Sohpetbneng.
U president ka Seng Khasi Kmie u Rgh Don Kupar Dkhar haba kren bad ki lad pathai khubor ha kamra jingialang jong ka Seng Khasi Kmie, Mawkhar Shillong haka sngi Balang ula ong ka jingiatreilang ne jingiatylli hapdeng kine ki ar seng ka juh iai don na kawei ka por sha kawei pat, kum ha ka jingrakhe ia ka Seng Kut Snem, ka Shad Suk Mynsiem, ka Chad Sukra bad kiwei kiwei, pynban ha ka liang jong ka lehniam Behdieñkhlam, mynta hi ka kynti ki arngut ki nongiam ba kynthup ia u Rgh Don Kupar Dkhar bad waheh OR Shallam president ka Seinraij Jowai, ki la pashat ia kane ka jingmut ka jong ki kumno lada ia plie lad ne khot sngewbha lang hajuh ha ka Behdienkhlam.
Kane ka rai kaba dei ka sienjam ba nyngkong la pdiang sngewbha da ka Seng Khasi Kmie, kaba ha shwa pat ban ai pdiang ia kane ka jingkhot sngewbha ka Seinraij Jowai, la leit shwa da ka shat ka khein ka khnong ka bishar ban da ia pan hukum na U Blei Trai Kynrad, namar wat ha khmat u paid uba bun balang baroh baroh un niew ia ka shad Behdienkhlam tang kum ka tamsa tamhoi, hynrei ha lyndet pat, ka dei ka lehniam ka leh rukom kaba da iaid lang ryngkat bad ka nguh ka dem Blei.
Kane ka jingiashim bynta kyrpang da ka Seng Khasi Kmie sha ka Behdienkhlam ka dei artad halor ka nongrim jong ka jingrakhe ka India ia ka jingioh laitluid kaba 75 snem bad kumjuh jong ka jingioh iala ka jylla kaba puyra kaba 50 snem.
Haba jubab hato kane kan dei ka jingsdang kaba ka Seng Khasi Kmie man la u snem kan ia snoh kti lang beit noh bad ka Seinraij Jowai ha kaban leit ban rah tabut, na ka liang u Rgh DK Dkhar, u la ong ba ha ki snem kiban wan ruh lada jia ba u para u pan ia ino ino I tiar ai sngewbha ne jingiarap na u hymen ne na la ka Kmie bad lada sngew lah ka bor, ka Seng kan leh ia katta bad kan shong halor ka jinglah bad kum u longsan u mansan, un hap ban iakren ia la ki para dkhot bad kumjuh ia ki samla ba lada ki ia don ka por bad lah ruh ka bor, ka jingpynkhreh kan iaid beit shaphrang.
Facebook
Instagram
Youtube
Twitter
Leave a Reply