Yooluti ka Santa Mary wow heh ka Jaiñtia Hills Winter Festival ha ki snem wow wan

Syllad | The Rising MeghalayaDecember 28, 2023

Ka Seiñraij Ialong chirup wa ka chnat Tourism Department dei kyrchaan ka chnat Arts and Culture Department ka sorkar jylla da sdang ko ya ka tamasa wa e pyrtuid kam ka Jaiñtia Hills Winter Festival ya kawa da pynman ha ka 28 wa 29 tarik uni u bnai ha Madan Lyngkieñ, Ialong (harood ka Wah Myntdu).

Ya kani ka tamasa da pynman hajrong ka phang Harmony Across Borders heiwa chwa wow sdang da em ka yalang heiwa ka MLA ka Sutnga Saipung, ka Santa Mary Shylla da man ko kam ka kongsan wei da pynlai ya ka yalang da u Ivan Suting hei emlang ka sahep ka chnat Tourism wa pait ya ka West wa East Jaiñtia Hills, ka SD Shylla.

Ka SD Shylla hawa khana ko wa kani man ko ka tamasa wa nyngkong dooh kam kani hapoh Ri-loom Jaiñtia heiwa man ko ka rynsaan wow pynyoo ki Pnar ya ki sap yong ki, ki rukom im kamjooh ki baam tynre.

Da khana ko wa ha u snem wa dadep em 40,000 ngut kiwa uiñke wa wanke cha Ialong.

Kyrmen skem ko leh wa ha ki snem wow wan daw ye chooh u wanrah ya kiwa uiñke suwari chapoh ka thaaiñ.

Ka Santa Mary Shylla hawa e yei klam da kmen ko wow yoh sahep kam ka SD Shylla kawa da kreh chitom wow wanrah ya ki kaam wa bha ha waroh ki ar tylli ki District.

Yooluti ko leh wa kani ka tamasa Jaiñtia Winter Festival daw heh ko kat dang lai ki snem.

Da sñiawkmen ko wa da ye u wai ya ka yingkieñ lai kjat wa da ye u kaap chiliang yong ka Wah Myntdu wei wow sumaar ya ka Madan deiwa dam u noh ya ki klong wa ki plastic kat chawa em.

Chooh chooh da kyrmen ko wow ye u pynneh ya ka dustur wa kyrpang ki Pnar khnang wow tip ka pyrthai chaphang yong i.

Kiwi kiwa da klam ha kani ka sngi da yoh i klam pdiang burom na u President ka Seiñraij Ialong, u P Shylla, Secretary ka Seiñraij Ialong, u J Pale da e u ya ki kyntien khublei

Da pynphooh chooh ya ka yalang da ki chaad wa har rukom na ki Seiñraij waphær waphær na West Jaiñtia Hills kam ka Chaad Pastieh, Chaad Pliang, Chaad Warep, Chaad Sukra wa kiwi ki Chaad Tynre.

Hajrong ki dhab wa tem wa put kiwa rwai i siaw wa boon wei na kylleiñ ka jylla, ka ri wa ka pyrthai ki wow pynwyrngia ya ki paidbah daw em leh mynstep ka 29 tarik sa ka Fashion Show na u Daniel Syiem wei da em leh ki dukan dukdoh wa dai syntu, ki baam i dih tynre, ki tiar wa chna na chnong Lyrnai, wa kiwi.