​LADA “SHABUK” U TLOT BOR

Wansalan E DharJuly 23, 2020

U long shisha u dak jingkylli u ba heh bha, ba manla uwei pa kawei ngi dei ban shim ka jingkit khlieh ban kylli, balei katba dang mih ki sngi bad ki snem la iohi ba dang mih shuh shuh bun ki jaid jingsniew ba ha rukom ha ka Imlang Sahlang ne wat ha ki Ïing ki sem kaba la buh jingma haduh katta katta ba ka bor jong ka jingsniew ka la trei borbah ha kine ki sngi. Hato man la uwei-pa-kawei na ngi kiba la kot ka bor sngewthuh ka bor pyrkhat, ngi la ju puson mo ba, balei ki mih kine ki kam sniew ba ha rukom ha ka imlang sahlang kaba la pyntad dor ia ka hok longbriew manbriew bad haduh ba ka akor burom ka la hiar dor arsut kaba la iohi ba i kumba ka ain Blei ain Briew kam don shuh? Na ka por sha ka por, ki mih ki kam tuh kam lute, ki kam pyniap, ki kam thok kam shukor ki kam leh beijot leh donbor ia ki kynthei ki khynnah.

Ka long ruh kaba da i sangsot shisha ban iohi ia ki kam sniew la ka long ha ki kot khubor ne Telibishon, la ioh sngew tang kata ka jing ia kren ia kyni hapdeng ki briew bad ka jingkhnium kaba mih na ka shyntur kaba ki da sngewpangnud shi katdei eh na ba kharoi ba kynrei ki kam sniew. Hato katno ngut eh kiba puson ne pyrkhat ba naei ka tynrai jong ka jingsniew ka wan, bad balei ki kam sniew ki la nangjur katba nang ki sngi ki por? sangsot ki briew ha kine ki sngi, naduh ki khynnah, ki samla wat haduh ki tymmen ki san, tang namar ka spah pyrthei bad ba ki ia beh ia kata ka ‘Rongphong Pyrthei’ kat haduh ba kim don por shuh ban pyrkhat halor ki tynrai ba ka jingsniew ka sdang ban mih. Hynrei ki ia beh pynban ia kata ka spah pyrthei, bad klet noh ban wad ia ka tynrai ba ka jingsniew ka mih.

To ngin phai dien khyndiat ban puson kumba ong kine ki kyntien, “Ka kam leh isynei ka sdang na la Rympei”. Sngewsih ban ong ba ha ki por kiba mynta na ba bun hi ki ia beh ia ka por ha la ki jong ki jong ki jing dawa ka kam. Kumta bun ki longing kim don por shuh ban hikai ia la ki khun ha la rympei “Sawdong ka Lyngwiar Dpei” da kane ka jingleh klet, ka long pynban kum ka jingai mon ia ki ban leh, ban iaid ban ieng ha la ka jong ka mon sngewthuh. Namarkata, nai wad shuh ia kiwei pat ki daw tynrai ba ka jingsniew ka mih, hynrei kum ki Longing Longsem, ki Kmie ki Kpa, ki Longkni Longkpa ngin pyrshang ban hikai ia la ki khun ha la Rympei, namar ka rympei ka long ka Shlem saindur ia u wei pa ka wei naduh ka akor ka burom haduh ka hok longbriew manbriew, ban ioh jinghikai naduh na rympei ka long kumba bat ia ka waitlam ka ban ai jingiada na ki kam sniew kam smeh ha ka imlang sahlang.

Ka iing kaba don ka jingiatylli, jingsngewthuh jingmut bad ka jingiaieit ba mar kylliang ka don ruh ha ka ia kata ka jingtieng ban leh ia ki kam sniew. Hynrei, lada ka iing ka iapait ia pra, lah ban ong ba ki kam sniew ruh ki don hangta, namar U Shabuk u don sha jngai nangta.